عزالدين العلالي :
مدينة القصر الكبير ولات مدينة العجائز… جميع الشباب كايهاجرو منها… واخا سواء المدينة او الاقليم عندو مايعطي على جميع المستويات… اقليم من أهم المناطق الفلاحية فالمغرب.. وفيه حوض اللوكوس لي هو ثاني أكبر حوض مائي فالمغرب.. إقليم تقدر تدير فيه سياحة تاريخية وغابوية وبحرية… أحسن موقع لمنطقة صناعية لي جا بين أكبر قطبين صناعيين فالمغرب، طنجة والقنيطرة…
إقليم منعدم فيه المدارس العليا، يالاه عندك كلية فالعرائش وكلية فالقصر الكبير، واخا فيه الشباب بالآلاف كلهم كايضطرو يمشيو للمدن الأخرى.. إقليم فيه من أشهر موانئ الصيد… ولكن واخا هكاك إقليم ميت كايقتلوه بزز.. الوضع الصحي كارثي… القصر الكبير مازال لحد الآن بدون مستشفى.. ماكينش حتى تحفيز للقطاع الخاص يدخل المدينة واخا المرضى من هاد المدينة كايشكلو أكبر نسبة ديال الوافدين على المستشفى الجامعي طنجة حيت مالقاوش فين يتدواو فمدينتهم…
البنية التحتية لي دمراتها الفيضانات.. حتى البنية التحتية فالعرائش مهترئة… مشكل النظافة خصوصا فالعرائش… بحر العرائش لي عوض يديرو قنطرة فيها بضع أمتار خاصك تضرب نص ساعة طريق باش توصل ليه… سياسة تدبير مياه سدود الاقليم لي غير مفهومة بتاتا… مازال خدامين بمحطة طرقية قديمة فالقصر وماكين حتى مشروع بناء محطة جديدة… إصلاح قنطرة طريق الرياط لي واخدة وقت طويل وكاتزيد تعمق مشكل عزل المدينة… طريق القصر الكبير القلة لي تهرسات وتحفرات ولات خطيرة على السائقين.. لي محافضتش الطريق يلقا راسو هبط فالجبل.. زيد عليها الدواوير لي عندهم فقط لي بيسط باش توصل ليهم…
الخلاصة إقليم العرائش القصر الكبير إقليم منحوس كاع معندو زهر… أربع نواب برلمانيون بغينا يكون فيهم شي واحد لي بصح غادي يدافع على الاقليم ويكعدو شوية.. واخا هو إقليم رزقو الله بكلشي، هو أكثر إقليم مهمش فجهة الشمال
