(((زيادة الفقصة)))
كلشي غلا
ما بقى فالعيشة ما يحلى
بنادم يتوجع
…ما عرف راسو بش تبلى
عار و عار
الزيادة فالاسعار
لمسكين داق الاضرار
قرصة تابعة قرصة
نخصة مور نخصة
لحياة مكرفصة
وشكون يعطيه فرصة
……..يعبر على هاذ الفقصة
فقصة الزيادة ….بلا إفادة
الوقت عليه عدادة
وشكون به يرفق
يذوقو من لحلاوة لحياة غير شدق
راه الحال عليه زايد يضيق
لكبدة على لولاد اتحرق
……..وما جبر ما ينفق
وشكون
يشوف هاذ الحالة
ما سبقت مع لوالة
شي عجباتو لحالة
واكثرية قالو هذي أكبر مهزالة
…….هاذ الزيادة غير لبسالة
احمد بوعسرية….زجل لوكوس
