نبيل اليعكوبي :
سنة 2003 كنت مزال صغير وكنت نخرج بالليل خلسة نكلس مع ولاد الحومة وخا كانو كبار عليا وكان واحد منهم سيفطوه ريفولي من هولاندا ، قبل يحرك خدا اجازة قديمة فليكونومي و ملقاش خدمة…
كيعاود بلي حرك فالواحد رموك في التسعينات و مخلا حتى بلاد في اوروبا…
من كان مين يبدى يعاود كلشي كايسكت…
كان يقولينا تما كاتفيق صباح ، كتحل تلاجة كاتلقاها عامرة ، كتفطر ، كاتمشي لمحطة كتلقى العد التنازلي فشاشة حتى كايوقف عليك الميترو، كتركب فيه…
الناس كلشي ساكتة لي داير موسيقى فودنيه لي كايقرى كتاب…
حتى واحد ماكايهز فيك العين…
كتمشي للخدمة كتلقى ناس، كيحاولو يعلموك ، و يتواصلو معاك بطريقة فيها بزاف ديال الاحترام…
مكايدخلوش فالخصوصية ديالك…
كان يقول لينا هنا كاتفيق صباح كتلقى سي حمد حاط كرسي اون فاص ليك و حاضيك و حاضي لحومة كاملة و عشية كايعطي التقرير لكاع ناس لكبار ديال الحومة… حت معندهم شغل من غير ضواسا والهضرة فعباد الله ليل ونهار
قالينا لهيه كتدخل لسوبير مارشي كاتدور ماكاينش لي حاضيك ،
هنا كاتدخل غير المحل ديال لحوايج مولاه كايبقى تابعك بحال الى غادي تسرق ليه واخا انت برزقك…
(هنا وطن ) فاش كاتمشي لادارة ، مكاينش لي يتسوق لك ، يقدر اقل مرتبة فيهم يحكرك و متقدرش تهضر ، ولا يقولك سير حتى لسيمانة جاية…
كان يعاود لينا لهيه مين كان يدخل لشي ادارة بحوايج الخدمة…
كايبقاو عليه المواطنين زيد انت اللول و يسبقوه حيت فبالهم بلي جاي من الخدمة يقضي غراض و مزروب…
كلشي شاد صف و محترم…
هنا كتدخل غي لحانوت كاتلقاهم مجموعين عليه بحال دبان ويجي واحد من لور يقولو لحسن شي طوفيطة من تما…
لهيه مكاتحسش براسك متهم ، ولكن هنا في المغرب انت مذنب مع وقف التنفيذ، فين ما مشيتي ، الى مكانش عندك فلوس ولا شي منصب فماغادي يحتارمك حتى واحد…
كان يقولينا واحد الجملة بالهولاندية حتا حفظناها…
De samenleving is gebaseerd op vertrouwen, niet op controle.
لي كتعني البلاد مبنية على التقة ماشي الحضية…
الانسان كايتيق فيك أبار ديفو حيتاش انت جزء من المنظومة ديالو…
كلشي نقي ، كلشي مرتب ،حتى نفسيا كترتاح…
صبات شتا سبرديلة ديالك ماكتوسخش ، ماكاتبقاش تنقز لكلاتي و الغيس…
كاتكون حر ، كاتشرب فزنقة ، معرية ولا مغطية كايجيو عندك بنات ولا صحابك لدار بدون ما يحكم عليك شي واحد ولا جارك يعيط على البوليس ولا يديرو عليك ودادية ديال ضد زوافرية…
كتحس بلي القانون فوق الجميع بحالك بحال اي شخص كيف ما كانت لا كلاص سوصيال ديالو…
كتبغي تخدم كين خدمة فاش ما بغيتي والخدمة لي بغيتي وصالير لي يرضيك
فلخر ديال الشهر ، مين كتخشي كارطة فالحيط ،كاتهز صالير ، كاتخلص الكراء و الضروريات كاتلقى باقي ليك بزاف باش تعيش الكماليات…
حيتاش عارف الى مرضتي غادي تداوا و الى بغيتي اي حاجة جات فخاطرك غادي تجربها…
الحرية ديال تشد تران و تمشي لالمانيا ،و سيمانة جاية تمشي لفرنسا ، و تمشي تشرب قهوة فبلجيكا و ترجع تنعس فامستردام مايعرفهاش غير لي عاشها…
بغيتي طوموبيلة زوينة غادي تشريها ، بغيتي تدخل لاغلى مكان فيك يا اوروبا مكاينش لي غادي يمنعك ولا يحكم عليك…
واحد القولة ديما كنت نكتبها ستلهمتها منو ، كان يقولي ، عندما نعود الى وطننا الام نقسم على ان ننفس عن عروبتنا ونظهر معدننا …
علاش كانبقاو نطلقو الموسيقى بجهد و نرميو كانيط ديال بيرة من السرجم ، و نحركو سطوبات…
حيت احترام القانون و الوقت كايعيينا و مفروض علينا…
قالك مين سيفطوني ريفولي غلطت و نفست عن العروبة واظهرت المعدن ديالي فوسط اوروبا و ضربت مراتي ، واحد الشهبة هي لي قدات ليه لوراق و نهار طغا عليها حرماتو منهم…
هد الصديق مقدرش يعيش في المغرب حيتاش ولف نمط العيش ديال اوروبا ، و حاول بزاف المرات باش يرجع ولكن للاسف بقى في المغرب ، و كان على شعرة يهرب ليه ذاك الطائر لي هو العقل دابا معرفتش الاخبار ديالو و نتمنى يكون مزيان…
اوروبا لي عاش فيها هد الصديق مابقاتش كيف كان عاشها حيت مشاو ليها بزاف بحالو و مع الوقت مين كترو رجعت عادي تنفس عن عروبتك ومعدنك واصلك، حيت المحيط ديالك كولو بحالك…
كاين ثلاث انواع لي باغيين يمشيو لاوروبا النوع الاول هو لي صحاب ليه الى مشى لاوروبا غادي يبقاو يتلاحو عليه شهبات ويعيش الحياة و يدير لفلوس…
و كاين النوع الثاني لي كايقلب على الامل
والنوع الثالث ،لي كايقلب على مكان ينتمي ليه و يعيش كإنسان فعال ، محترم ،حر…
هنا كنتفكر واحد كنت خدام معاه واحد خوه مشى لكندا بالقراية و شاف واحد ولد حومتو بالصدفة ، سايك ترام ، خونا كان ضبر فواحد لغليضة و نقذاتو من المستنقع لي كان عايش فيه…
خونا كان مبلي و النهار كامل و هو جالس فالقنت…
من مشى لكندا و احتراموه و علموه صنعة و عطاوه ترام يسوك بناس…
اول ما شافو المغربي بحالو و هو يقوليه و تاقو فيك عطاوك تسوك ترام…
حيت حنا شعب لي كانحتاقرو بعضياتنا…
سيكيريتي الى قلتي ليه سلام و حسستيه انه انسان، غادي يقوليك فين داخل…
كاين دراسة علمية كاتقول بلي بنسبة 99 في المئة الإبن غادي يخرج يشبه للأب ديالو ماديا و إجتماعيا طبعا كاين إستثناءات لكن قليلة…
كان الأب ديالك فلاح فغادي تخرج فلاح…
فأنت كإنسان زايد و كابر فعائلة بسيطة، الأب كايتقاتل على لقمة العيش غالبو الضو والما والمصروف و ساكن فحي شعبي ،المصير ديالك حتمي و تقرر قبل ماتزيد , الجينات ديال الأب ديالك حكمو عليك قبل متخرج للوجود…
ونهار كاتزيد كاتلقى راسك وسط واحد القوقعة صعيب تخرج منها و مستحيل وفأغلب الحالات…
الى كان الاب ديالك كايضرب تمارة و عايشين بخبز و اتاي والمشاكل من كل جهة وطريق و غالبا غادي يزيد شي بلية لي تخرب ليه الجسم ديالو فغادي ينقل ليك هذ شي و غادي تطلع محكوم عليك بالمرض و الضعف من الأول…
ويلا كان الاب ديالك
مكايحتارمو حتى واحد حيت فقير فغادي تلقى نفس المصير ،غادي تعيش فقير حقير مهمش مكانش لي غادي يتسوق ليك و غادي تبقى عايش فهذيك القوقعة حتى تموت…
و يلا الى كنتي عايش فحي شعبي يوميا كاتشوف لمضاربات والفقر المدقع و تدخل لدار تلقى المشاكل ، مغاديش تقدر تقرا مغاديديش تقدر تنتج فكريا ،دماغك غادي يكون محدود…
فغادي تعيش حياتك بنفس الطريقة واخا انت مباغيش هذ الحياة…
من قبل كانو الناس كايستسلمو للمصير ديالهم تحت غطاء الدين و القناعة و هذ شي لي كتاب علينا و كايرضى يعيش فهذ الظروف…
واليوم مع سوشل ميديا و الانترنيت تبدلت القضية و رجع الإنسان يحاول يختارق هذ القوقعة رغم أنه ماشي ساهل الإختراق ديالها ، صعيب بزاف لدرجة الموت…
تقدر تخيلها بحال فيلم هانݣر ݣايم…
كاين لي حاول يخرج منها وادى للهلاك ديالو كنهضر على الناس لي بغات تحرݣ فقوارب الموت و لا الناس لي مشات عن طريق تركيا ، لي كايتمشاو ألاف الكيلوميترات…
ولا بحال شفنا هد الايام شنو وقع فسبتة…
صحيح كلنا كانحاولو نخرجو منها لكن قليل لي كايخدم عقلو و يخرج بطريقة ذكية…
باش تحاول تخرج بطريقة عنيفة او بالقوة فراه المصير ديالك الفشل بحال واحد لي بغى يدير الرياضة باش ينقص الوزن و فاق صبح مشى يجري و يتعاند مع واحد لي سنوات و هو يجري طبعا المصير ديالو هو الإصابة…
لكن الى بدا غير بشوية و حسب القدرات الجسدية ديالو فغالبا غادي يطول…
هذا وقت ديال الى خدمتي راك عبد، الى عندك فريبيرطوار HR, راك عبد…
الشي لي خلا الشباب يقلبو على الحل العاجل لي هو الهجرة للمجهول…
كيف واحد سولوه من هدوك لي دخلو لسبتة كاليهم كانقلب على Hope…
هذ شي كايخلي الناس تعيش على واحد الأمل زائف لي كايأدي لواحد المتلازمة سميتها false hope syndrome
و لي كاتنقالب لإكتئاب حاد و أفكار إنتحارية و كره للذات…
هد شي خطأ حيت كاينافي طبيعة الإنسان حيتاش حنا محكومين من الجينات و الغرائز ديالنا و ماشي كلشي يقدر يرجع انتروبرونور ويدير بزاف لفلوس ولكن الناس محتاجين خدمة لي ممكن تخليهم يعيشو بكرامة ماشي أمل زائف لي يخرج ليهم على حياتهم…
لذا أخي الحازق فكر 100 مرة قبل ماتقرر تولد و تحكم على ولدك بمصير بحال هذا…
فالموغريب تلاهينا مع أحسن ملعب في العالم و كأس العالم وزليج والقفطان وبونو مول الضحكة وحكيمي و الصحرا مغربية والجزاير عدوتنا ورجعنا نشوفو غير مامبا فيت و طاها ايسو فالسوشل ميديا و رباط و طرقان و CFC و هالا هالا و عوازا وسخو لينا لبلاد اما حنا نقيين و متحضرين و دوك المصريين صحاب الله على المغرب و شوارعو نظيفة اوي اوي كأنك في اوروبا وموش في افريقيا…بيعونا العجل وعشنا فالوهم وليوم فقنا على كثر من 90 غريق من شبابنا راه ماشي ديما العام زين…
كنا هانيين شوية و هو يخرج هد النوع هارب من جحيم البطالة والأمل المفقود لمدينة سبتة المحتلة
و فكرنا بالحقيقة ديالنا و بلي موجودين منهم الملايين ديال نسخ وعمرهم ما يتسالاو ماحد البطالة والفقر وانعدام فرص الشغل والزبونية والمحسوبية وباك صاحبي ودفع فلوس باش تخدم ونفس العقلية كاتورث فالمجتمع ديالنا…
و هد هو المغرب الحقيقي ، تعيا ما تشوف و تكول كيما خلاها حاتم عمور الله يدير شي تأويل ديال الخير و الله يحد الباس…
أبو علاء المعري قال هذا ما جناهُ عليّ أبي وما جنيت على أحد”
كان مأمن بهذ القولة لكن معرفش بلي الأب ديالو جاب للبشرية واحد من أعظم الكتاب والشعراء لي دازو فالتاريخ و بلي مور ما مات بمئات السنين مزال الناس كاتذكرو و تقرا ليه…
