همي هذا

احمد بووعسرية..زجل لوكوس

همي كثر وزاد فهمومو
ما قدرت نحاربو ونلومو
ما هو بحر نقطعو ونعومو
ما هو عواشر ولا رمضان نصومو

همي فات لحد
ما بقالو ساحل ولا مد
لمن نحكي حكايتي ونسرد
يفاجي همي وبيه نسعد

ما هو وزن بالصاع ولا بالمد
ما هو حساب دوخني فالعد
ما عرفتو موروث من لجد
عييت نبحث ومليت نجتهد

قلت نحاول نتفهم
بقيت نقلب شنو الهم
جبرتو ساكن معايا فالدم
و مع حياتي يقسم

عليها رجعت حياتي مقسومة
مرة ضاحكة ناشطة مبسومة
مرات بزاف حزينة مهمومة
و عاد عرفت اش ساوي انا فالسومة