– ذ محمد علوى :
شَّهْقَة مَكْتُومَة فَجُّوفْ
خايْفَة تَتْرامَى
فَلْحَلْقْ واقْفَة
وَ صَّوتْ مَنْها بَحْ
لَفْسادْ لَمْلَوَّنْ خْمَرْ
فْلَعْقولْ زادْ طْفَحْ
لْجُرْحْ طَالْ
وَ صْدِيدْ مَنُّو نْضْحْ
كَثْرَتْ رْبَايَعْ
تَا رَبَّاعْ فِيهَا مَا فْلَحْ
تْقَلَبْ آشْ دَارْ
تْجَبْرُو هُوَ لِّي رْبَحْ
هْمومْنا طْغاتْ
و لْقَلْبْ تَقْهَرْ
الله يَحْفَظْ مَنْ جَّايَّاتْ
يا لْخُو لا تَعْصَرْ
يَكْفَى ما عَشْناهْ أُفاتْ
راهْ جَّنْبْ تَدْبَرْ
أَمَكْوانَا مَا شَفْناهْ
كُلُّو يَقْهَرْ
لِّي بْقى مَنْ رُّجْلَة راحْ
لْغُلْبَة فيها ذْكَرْ
فَزْريبَة كَتْرُو سُّرَّاحْ
مَنْ لْمَدْوَلْ لَفْراقْشِي شْفَرْ
لْعَزْوَة مْشاتْ
تْسْمَعْ غِيرْ الله يَسْتَرْ
لْجاهَلْ عَايَشْ مَرتَاحْ
وَ ذَّبَّان دَايَرْ بيهْ يَشْكُرْ
مْقَوَّسْ رُّزَّة
فَسَّلْكْ يْقَيَّلْ يَهْدَرْ
يَرْحَمْ مَنْ جَا وْجابْ
وَخَّا قاطَعْ لَبْحَرْ
مَا خَلَّا سُوقْ نْهَار ْ
ماخَلَّا سُوقْ لَفْجَرْ
شْهِيقْنا مَكْتُومْ
فَجُّوف وَلَّا حْجَرْ
أَمَكْوَانَا …ماقَاسِناهْ
يْدَوَّبْ صََمْ
وِ يْهَرَّسْ لَحْجرْ
