محمد علوى:
☆ ☆
لَقْصِيدَة رُقْعَة زَاهِيَة
قْيامْها كْلامْ مَحْبوكْ
بَمْغِيزْلَةْ لَشْعارْ داوْيَة
سْدَاهَا مَنْظومْ مَسْبُوكْ
مْرَمَّتْها نَغْمَة مْسَاوْيَة
مْعَلَّمْها دَرَّازْ مَحْكُوكْ
فَنَّانْ صْنَعْتُو غَاوْيَة.
رْقَايْقِي صْنَعْتُو ضَاوْيَة
لَصُّوفْ يَنْسَجْ يَرْسَمْ
لَّقْصِيدْ يَرْصَفْ يَنْظَمْ
بَبْرَاوَلْ لْمَلْحونْ يَنْغَمْ
بَلْغَوْصْ يَصْدَحْ يْهَمْهَمْ
“غَطْسَة”وَ لْفَاهَمْ يَفْهَمْ
سَّامَعْ يْضَنّو يْبَرْكَمْ
حْرَايْفِي فَلْمَطْوي لَقْيَامْ يْرَمًّمْ
وَ لْمَنْسَجْ مْرَتَّبْ طَاوِي
وَ دَّفْ يَنْقُشْ اِدَمْدَمْ
بَغْنَاهْ شَادِي دَاوِي
مْعَ لْعَسْفَة مْسايَرْ لَكْدَمْ
دَّقْ مْعَ رَدَّة تَمْ
نَّزْقْ فْدَرْبْ لَقْيامْ جَارِي
يَنْسَجْ رْفِيعْ لَكْسَا سَاوِي
بْحَالْ لَقْلَمْ يَنْظَمْ دَاوِي.
☆ ☆
لَقْصِيدَ رُقْعَة زاهِيَة
كْلامْها قْيامْ مَحْبُوكْ
بَمْغِيزْلَةْ لَشْعَارْ دَاوْيَة
سْدَاهَا مَنْظومْ مَسْبُوكْ
توضيح:
كلمة (غَطْسَة) تستعمل عند “دَّرَّازَة” ككلمة تقنية و كلمة سر ، ينبه بها مساعد “لْمْعَلَّمْ” عندما يعلق النزق بين خيوط المنسج ، حتى لا تبثر بفعل جر الدف ، كما تستعمل عندما يريد الصناع التوقف عن الكلام ، لما يدخل شخص غريب غير مرغوب فيه إلى حرم الدرازة حتى لا يسمع أو يفهم ما يقال وقد تداولتها ساكنة القصر الكبير فيما بينها بنفس المعنى .
القصر الكبير في : ٢٩/٠٣/٢٠٢٣
