أنا غِيرْ دَاوِي ، لَمِجَرَّبْ ، يَعْرَفْ كْلَامِي وَاشْ سَاوِي…

محمد علوى:
أنا غِيرْ دَاوِي ، لَمِجَرَّبْ ، يَعْرَفْ كْلَامِي وَاشْ سَاوِي…

حْوَالْ نَّاسْ
☆ ☆

لْمَسْكُونْ
إِلَا شَدُّوهْ لَسْيَادْ
يْغَيَّبْ يَتْغَيرْ حَالُو
وَ صِّيَّادْ
مَنْ غِيرْ سْلَاكُو وَ زَّادْ
يْحُطْ سْلَاحْ بَكْمَالُو

لْمَغْرُومْ
إلَا غَابْ عْشِيرُو بْلَعْنادْ
يْطِيرْ عَقْلُو تَتْغَيَّرْ حْوَلو
وَ لْعَالَمْ
إِلَا فْقَدْ لْكُرَّاسْ وَ لَمْدَادْ
يْحُطْ لَقْلَمْ يْقَلْ كْلَامُو

لْمَالَكْ
يْلَا ضَيَّعْ رَسْمْ لَبْلَادْ
يْطِيشْ يْتَلَّفْ مْكَانُو
وَ طَّالَبْ
يْلَا ما تَبَّثْ لَعْتَادْ
ما يْشَدْ مِيزَانْ قْوَالُو

لْمُولُوعْ
يْلَا شَدْ رِّيشَة و ْلَسْنَادْ
فْلَلْوَانْ تَقْرا سْرَارُو
وَ نَّظَّامْ
يْلَا نْطَقْ بَحْوَالْ لَعْبَادْ
تَسْمَعْ لََحْكايَمْ فَشْعَارُو

لَمْرَا
يًلَا حَسْبٓتْ لوْلَادْ وْتَادْ
يَا مَحْنَةْ لَبَّاتْ فََخَّرْ حْياتو
وَ لْبَنْتْ
يْلَا تْرَبَّاتْ وَ قْراتْ
يَا فَرْحَةْ لِّي كانَتْ حْلَالُو

لْغَايَبْ
يْلا طَالَتْ خْبَارُو وْ عَادْ
تْزِيدْ فَلْقَلْبْ هْوَالُو
أُ لَفْقِيهْ يْلَا كَثْرَتْ عَتْرَاتُو
يَسْمَحْ فَشَّرْطْ يَرْفَدْ رْحِيلُو

هَذَا حَالْ نَّاسْ
وَ حْوَالْ لَعْبَادْ شَلَّا
شِي عَاجْبُو رَاسُو
شِي كَايَتْمَنَّى
شِي فَحْيَاتُو مَغْبُونْ
شِي فَلْخَيْرْ يَتْسَلَّا
حْيَاةْ بْنادَمْ حَرُوبْ
سْلاحُو عْقَلْ اُهَمَّة
مَشِّي بَكْلَامْ مَنْطُوقْ
بَلْسَانْ كُلُّو زَلَّة
إِلَا دَخَلْتِيها جَنْبْ
يَّامَكْ تَتَّلَّا
كُونْ ثابَتْ رْزِينْ
فْكُلْ مَكْلَسْ أُ لَمَّة
لَا تْكُونْ رْطَبْ رْهِيفْ
فِيكْ ظْرافَة شَلَّا
رْفَع ْراسَكْ
فْقيمْتَكْ تْهَلَّا
لَا تَخْضَعْ لَوْضِيعْ
يَرْكَبْ عْليكْ يَتْعَلَّا
لْحَكَّارْ إلَا غْلَبْ
عْلَى ظَهْرَكْ يَدَّلَّا
يْدِيرَكْ ضَحْكَة فَدَّرْبْ
يْقَشَّبْ عْلِيكْ و يَتْفَلَّا