محمد علوى:
☆ ☆
قَفْطَانْ بْلَادِي
زَاهِي مْذَهَّبْ مَحْفُورْ
مْوَشِّي بَحْرِيرْ
بَفْصُوصْ جَّوْهَرْ
مْنَبَّتْ بَتْواشِي
بَرانْدَة مْدَوَّرْ
لَابْساهْ زِينَة
بَدْرْ صافي مْنَوَّرْ
بَسْوَاكْ وَ لْحَرْقُوصْ
بْلا كْريمَة بْلا عْكَرْ
بَمْضَمَّة هايْلَة
بْنْيَاشَنْ تْشَيَّرْ
عْلَى قَدْ مَوْصُوفْ
اِخَلِّي لَعْقَلْ مْحَيَّرْ
قْيَاسُو مَتْبوتْ
بَحْسَابُو مْشَوَّرْ
مْنَبْتاهْ قَصْرِيَّة
قَامَة وْ زِينْ مْحَرَّرْ
زِينْها بَلْدِي
تَسْلَبْ كُلْ حاضَرْ
سُبْحانْ لْخالَقْ لَمْصَوَّرْ
يَبْقَى فَاهِي
عَقْلو طايَشْ مْسَهَّرْ
يَحْسَنْ عَوْنْ
لِّقَلْبُ هْشيشْ مْضَرَّرْ
بْقَصْرِيَّة قَفْطانْها
مْطَرَّزْ رْفِيعْ مْدَرَّرْ
ماسْ وَ تْبَرْ أُجَوْهَرْ
مْعَطَّرْ بَلْمَسْكْ وَ لْعَنْبَرْ
بَنْتْ لَبْلادْ يا لْقَصْرِيَّة
صَّنْعَة لَمَا غْنَاتْ تَسْتَرْ
الله يَعْطِيكْ سَّرْ
لِمَا يَبْلَى وَ لَا يَخْسَرْ
دَعْوَةْ لَمِّيمَة فْلَفْجَرْ.