احمد بوعسرية :
شوف النقطة
شحال عندها من حنطة
نقطة على نقطة
رجعت الارض مسرطا
فاتت لحدود
عمرت السدود
……غطات لجبال ولوطا
شحال من نقطة….دارت مولاها جلطة
كاين لي نجح بنقطة
واحد ضربها بسقطة غير على نقطة
ولي زير السمطة
……وعلى كرشو زغط زغطة
وعلى نقطة الموسيقا
زادوها فالميزان نقطة …وهي ضيع النوطة
كاين لي زاد فمخو نقطة وهو يتسطا
وشحال من واحد ورطتو ..ورطة
بحال ديك الطفيلي لي مفروط فرطة
ضرب الهمزة وسرطها …سرطة
ونوض على راسو الهيطة
بعد ما كان مستور فضحتو نقطة
واحد خرج على النقطة
غير تشعط شعطة بسباب قطة.
عاد كاينا نقطة نظام …حتى هي نقطة
ونقطة عبور …يعني ما تفوتش الشرطة
وشحال تكسات لحروف
…… من لفوق شي من لتحت بنقطة
ونزيدكم واحد النقطة
سالينا كتابنا وكلامنا بنقطة
وحتى هاذ لقصيدة نهيناها بنقطة
اوا شفتو النقطة شحال عندها من حنطة
والى جات على خاطركم عطيونا شي نقطة
احمد بوعسرية (زجل لوكوس)