أحمد بوعسرية :
اه يا زماني
والزمان تبدل
مانسيت مكاني
لي فتحت فيه ضو عياني
وتقطع فيه مصراني
عمري كنت معها نعاني
حليب صدرها….جغمة مقنعاني
لمسة من يدها…..مسكتاني
همسة من صوتها ….منعساني
بعطفها وحنانها …..كاسياني
بظل خيالها …..حامياني
خسار يا لعمر ما هي غير وحدة بلا تاني
اه يا زماني
وانا فالحياة
…..علمتني نحبو وعلى رجلي نزيد
وبلكلام لحلو اللذيذ
نظفتني
كلمتني
ولاعبتني
… وليت فيدها انسان جديد
رباتني
قراتني
فقهتني
….. ديما معها سعيد
حتى بانو ليا لكتاف
وبقات عليا تخاف
بغاتني نكون كن لطاف النظاف
……..ما نكون من لخفاف
اه يا زماني
تفكرت ليوم هاذ لمراة
عاشت حرة غرة
ما ترضا بالحكرة
ما تخون لعشرة
عمري نسا ديك الامان
غيبقى عايش معيا كانسان
و وصية اولاد هاد الزمان
كفة رضاها ثقيلة فالميزان
و الله جعل الجنة
تحت اقدامها ليك انت يا انسان
احمد بوعسرية زجل لوكوس